سلطة على شكل كيكة الطبقات

المقادير :
مافيها احتا شي تكلف واللي هي
البطاطا
الروز
الباربا
الجلبانة
خيزو
الدرة
والطون
وكلهم يتسلقو مع مليحة كل واحد بوحدو ويتصفاو ويبردو طبعا ونزيد لهم الطون والبطاطا والروز نزيدلهم المايونيز والكمية عينك ميزانك على حسب المول لي عندك وعلى فكرة غادي نستعملو المول لي كيتحل
نسلقو البطاطا نخليو شوية للطبقات ولي بقا نرفسوه مزيان مع شوية الزيت زيتون ولا زيت الطون

ندهنو المول بالزيت الطون ولا العادي ونلصقو عليه البطاطا من كل الجوانب

نبداو نحطو الطبقات والترتيب ماشي مهم

الجلبانة

البطاطا

خيزو

الروز

الباربا مخلطا مع الذرة

الطبقة الاخيرة هي البطاطا المرفوسة باش نسد على الطبقات

نضغطو عليها شوية ونغطيوها بالالمنيوم وندخلوها للمجمد تشد راسها غير شوية ونخرجوها باش تجينا ساهلة فالتزيين

وها هي منين نزولوها من المول بعدما بردات

دابا ندوزو للتزيين

كنطليوها كلها بالمايونيز ووباش نحصلو على داك اللون كنزيدو الكيتشوب او الطماطم ديال العلبة كتكون حلوة مع المايونيز حتى تحصلي عل اللون لي بغيتي ودهني الوجه وتعملي دوائر بالمايونيز عادي زواقة ديال الميل فاي خلاص كلشي عارفها

سلطة على شكل كيكة الطبقات